Amdanom Ni
Mae Canolfan Cymraeg i Oedolion Caerdydd a Bro Morgannwg yn Ganolfan o Ragoriaeth, gyda dros 25 mlynedd o brofiad yn dysgu Cymraeg i Oedolion.
Wedi ei lleoli yn Ysgol y Gymraeg, Prifysgol Caerdydd, mae’r Ganolfan Cymraeg i Oedolion yn denu 2,000 o ymrestriadau bob blwyddyn a chanddi dîm o ryw 70 o staff.
Cynhelir y cyrsiau Cymraeg ar hyd a lled Caerdydd a Bro Morgannwg, mewn nifer fawr o leoliadau, yn cynnwys neuaddau pentref, siopau, canolfannau iechyd a ffitrwydd, yn ogystal ag ysgolion, colegau ac adeiladau’r Brifysgol. Mae hyn yn sicrhau fod cwrs yn agos i chi.
Prifysgol Caerdydd sy’n gyfrifol am holl ddarpariaeth Cymraeg i Oedolion yn y 2 ranbarth ac mae’n derbyn nawdd Llywodraeth Cynulliad Cymru. Er mwyn darparu’r amrediad o gyrsiau, mae’r Ganolfan yn gweithio mewn partneriaeth gyda 4 sefydliad, sef Cyngor Sir Caerdydd, Coleg Glan Hafren, Coleg y Barri a Chyngor Sir Bro Morgannwg i sicrhau fod gan y dysgwyr ddigonedd o ddewis.
Mae ansawdd a gwerth am arian yn bwysig. Cynhaliodd Estyn 2 arolwg o ddarpariaeth Cymraeg i Oedolion y rhanbarth yn 2007. Roedd hyn yn cynnwys cyrsiau a redwyd gan y Ganolfan a phartneriaid eraill. Derbyniwyd Gradd 2, oedd yn gyrhaeddiad clodwiw iawn.
Mae ymchwil yn ganolog i genhadaeth Prifysgol Caerdydd, ac nid yw’r Ganolfan yn eithriad. Mae’n ymchwilio’n barhaol i gaffaeliad iaith ac o hyd yn ymdrechu i weithredu ar sail tystiolaeth ac ymchwil.
Cenhadaeth y Ganolfan
- Cynhyrchu siaradwyr Cymraeg sy’n cyfrannu at fywyd Cymraeg
- Darparu hyfforddiant Cymraeg blaengar ac o'r safon uchaf i ddysgwyr yr iaith
- Datblygu gweledigaeth Llywodraeth y Cynulliad i sefydlu’r Ganolfan fel y prif ddarparwr yng Nghaerdydd a'r Fro
- Defnyddio dulliau a chyrsiau dysgu dwys lle bo’n bosibl
- Cynnal a datblygu sefyllfa'r Ganolfan fel arloeswr yn genedlaethol yn y sector dwys o ran Cymraeg i Oedolion
- Cynnig ystod lawn a chynhwysfawr o gyrsiau ar amseroedd ac mewn lleoliadau gwahanol
- Datblygu deunyddiau dysgu, ymchwil-ganolog, o'r radd flaenaf
- Denu'r adnoddau dynol gorau i weithio yn y Ganolfan
- Cynnig hyfforddiant o'r radd flaenaf i diwtoriaid ym maes dysgu Cymraeg i Oedolion ac arwain ar gymhwyster cenedlaethol Cymraeg i Oedolion
- Cynnig hyfforddiant pwrpasol i'r gweithle sy'n cynnig gwerth am arian.
Sicrhau Mynediad
Mae Canolfan Cymraeg i Oedolion Caerdydd a Bro Morgannwg yn croesawu myfyrwyr o amrywiol gefndiroedd cymdeithasol, ethnig, crefyddol ac addysgol. Rydyn ni’n anelu at sicrhau mynediad i’n holl gyrsiau i bob myfyriwr; boed yn y Ganolfan neu mewn lleoliadau eraill yng Nghaerdydd a’r Fro. Mae hyn yn cwmpasu mynediad i adeiladau, cymorth dysgu fel Braille, print bras, gwaith dosbarth ar bapur lliw ac yn y blaen. Rydyn ni hefyd yn cefnogi’n tiwtoriaid i ddatblygu strategaethau dysgu sy’n cynnwys y rhain.
Os oes gyda chi unrhyw gwestiynau am ‘sicrhau mynediad’ i’n cyrsiau, neu os hoffech drafod cefnogaeth unigol neu addasu deunydd cysylltwch â’r Ganolfan. Os yw’n bosibl, cysylltwch â ni cyn i’r cwrs gychwyn i’n galluogi i gwrdd â’ch anghenion gorau gallwn.