Ysgolorion blaenllaw o’r UD yn ymweld â Chaerdydd

14 Ionawr 2010

Mae deugain o ysgolorion mwyaf mawreddog yr UD wedi ymweld â’r Brifysgol fel rhan o Fforwm Fulbright – rhaglen drochi ddiwylliannol flynyddol â phroffil uchel ar gyfer holl Ysgolorion Fulbright America sy’n astudio, ymchwilio ac yn darlithio yn y DU ar hyn o bryd.

Yn ystod eu hymweliad cyntaf â Chymru, cafodd yr ysgolorion gyfle i wrando ar ddarlithoedd gan rai o’r athrawon mwyaf blaenllaw yng Nghymru, wrth iddynt rannu agweddau ar yr ymchwil o safon fyd-eang sy’n cael ei chynnal yn y Brifysgol.

Cawsant eu croesawu gan Is-ganghellor y Brifysgol, Dr David Grant a’r Llywydd ac enillydd gwobr Nobel, Syr Martin Evans.

Sefydlwyd Comisiwn Addysgol yr UD-DU (Comisiwn Fulbright) ym 1948, ac mae’n cynnig yr unig raglen gwobrau academaidd drawsatlantig rhwng yr UD a’r DU. Bob blwyddyn, mae tua 50 o ddinasyddion y DU a 50 o ddinasyddion yr UD yn astudio, darlithio, cynnal gwaith ymchwil neu’n canolbwyntio ar ddatblygiad proffesiynol mewn sefydliadau blaenllaw yn eu gwlad letyol.

Y Brifysgol yw un o ddwy brifysgol yn unig yng Nghymru sy’n cynnig Ysgoloriaethau Fulbright, gan roi’r cyfle i rai o fyfyrwyr gorau yr UD astudio yn y DU.

Dywedodd yr Is-ganghellor, Dr David Grant, a groesawodd Ysgolorion Fulbright: “Roeddwn wrth fy modd yn croesawu’r Fforwm Fulbright cyntaf i ymweld â Chymru. Roedd yn fraint go iawn croesawu’r grŵp o Ysgolorion Fulbright rhagorol i Gaerdydd.

“Mae ysgolorion Fulbright ymhlith yr ysgolorion gorau yn y byd ac aiff llawer o ysgolorion Fulbright ymlaen i fod yn arweinwyr yn eu meysydd penodol.

“Un o flaenoriaethau mwyaf allweddol y Brifysgol yw meithrin a datblygu cysylltiadau presennol a phellach gyda’r UD. Mae gennym hanes hir o gysylltiadau ymchwil rhwng y ddwy wlad eisoes, gyda llawer o’n hacademyddion yn cymryd rhan mewn gwaith ymchwil gyda sefydliadau yn yr UD a datblygiad parhaus cysylltiadau strategol a chydweithio.”

Un o’r tri o Ysgolorion Fulbright sy’n astudio ym Mhrifysgol Caerdydd eleni yw Dr Sarah Campbell, a ymunodd ag Ysgol y Gymraeg y Brifysgol ym mis Medi 2009.

Mae Dr Campbell, sydd â Doethuriaeth mewn Drama Ganoloesol, yn bwriadu treulio ei hamser yn y Brifysgol yn datblygu ei hymchwil i ddrama Gymreig.

Dywedodd Dr Campbell: “Nod Ysgoloriaeth Fulbright yw dod ag ysgolorion o’r Unol Daleithiau a gwahanol wledydd a diwylliannau at ei gilydd. Roeddwn wrth fy modd yn cael y grant ac roedd rhaid i mi astudio yng Nghymru. Cefais fy nhynnu at ddrama Gymreig gan fod cyn lleied o waith ymchwil arni. Mae’r gwaith diweddaraf a gyhoeddwyd arni bron yn gan mlwydd oed. Nid yw’r ddrama ‘Y Gŵr Kadarn’ wedi bod ar gael i ysgolorion.

“Bydd fy Ysgoloriaeth Fulbright yn fy ngalluogi i gyhoeddi’r gwaith hwn ac arwain perfformiad o’r gwaith na fyddai ar gael yn flaenorol.”

Rhoddodd ymweliad tridiau â Chymru, a drefnwyd gan Gonsortiwm Rhyngwladol Cymru (WIC), gyfle i Ysgolorion Fulbright ymweld â chastell canoloesol Caerdydd, canolfan gelf flaenllaw'r ddinas, Canolfan Mileniwm Cymru (CMC) a chartref Llywodraeth Cymru - Cynulliad Cenedlaethol Cymru, yn ogystal ag ymweld ag Abertawe ar gyfer ystod o ddigwyddiadau.

Un o raddedigion proffil uchel y Brifysgol a fydd yn cael budd o’r cyfle i astudio yn yr UD sy’n cael ei gynnig gan Gomisiwn Fulbright yw’r AS ar gyfer Dwyrain Caerfyrddin a Dinefwr, Adam Price.

Mae Adam Price, a astudiodd Astudiaethau Cymunedol Ewropeaidd ac sy’n gyn ymchwilydd cysylltiol yn adran Cynllunio Dinesig a Rhanbarthol y Brifysgol, wedi cyhoeddi ei fod yn bwriadu tynnu’n ôl fel AS yn ddiweddarach eleni i ddod yn Ysgolor Fulbright yn astudio datganoli a datblygu economaidd yn yr UD.