Llwyddiant Tarian Varsity

15 Ebrill 2011

"Mae Tarian Varsity yn symbol o ragoriaeth gyffredinol mewn chwaraeon a gwnaeth myfyrwyr Caerdydd eu gorau glas,” meddai Jack Perkins, Llywydd yr Undeb Athletau. “Dydy Caerdydd ddim wedi methu ennill Tarian Varsity erioed a dwi wrth fy modd fod cystadleuwyr 2011 wedi parhau â’r traddodiad hwn.”
Llwyddodd myfyrwyr Caerdydd i ennill Tarian Varsity am y nawfed flwyddyn o’r bron gyda pherfformiadau gwych ar y meysydd chwarae.

Ar 30 Mawrth aeth chwaraewyr talentog o brifysgolion Caerdydd ac Abertawe benben yn Athrofa Chwaraeon Cymru mewn chwaraeon oedd yn cynnwys badminton, sboncen a hoci.

Roedd cystadlaethau syrffio, sgïo, eirafyrddio ac athletau ar ddyddiadau eraill yn cyfrif tuag at Darian Varsity. Y canlyniad terfynol oedd buddugoliaeth i Gaerdydd dros Abertawe drwy ennill 18 cystadleuaeth o’i gymharu â 10 Abertawe.

Penllanw’r diwrnod oedd gêm rygbi Varsity, a gynhaliwyd yn Stadiwm y Mileniwm i ddynodi 15fed pen-blwydd y gêm. Darlledwyd y gêm am y tro cyntaf ar S4C a daeth dros 14,000 o wylwyr i gefnogi eu tîm.

Daeth y gêm agos i ben gydag Abertawe’n codi Cwpan Varsity, gan guro Caerdydd o 28 pwynt i 18.

Tabl canlyniadau llawn